50 arsye pse Jezusi erdhi të vdiste

Pyetjet më të rëndësishme që mund të bëjë dikush janë: Pse u kryqëzua Jezusi? Pse vuajti aq shumë? Çfarë lidhje ka kjo gjë me mua? Përfundimisht, kush e çoi atë në vdekje? Përgjigjja për pyetjen e fundit është: Perëndia. Jezusi ishte Biri i Perëndisë. Vuajtjet e Tij ishin të pakrahasueshme, mirëpo i gjithë mesazhi i Biblës na sjell te kjo përgjigje. Çështja thelbësore në vdekjen e Jezusit nuk është shkaku, por kuptimi i saj — qëllimi i Perëndisë. Për këtë bën fjalë ky libër. John Piper ka grumbulluar pesëdhjetë arsye nga Besëlidhja e Re. Jo pesëdhjetë shkaqe, por pesëdhjetë qëllime — si përgjigje për pyetjen më të rëndësishme me të cilën ballafaqohet secili prej nesh: Çfarë arriti Perëndia për mëkatarët si ne kur e dërgoi Birin e Tij që të vdiste? John Piper është themeluesi dhe mësuesi kryesor i desiringGod.org, si dhe drejtor i Kolegjit dhe i Seminarit Bethlehem. Ai shërbeu për tridhjetë e tre vjet si pastori kryesor i Kishës Baptiste Bethlehem në lagjen “Twin Cities” në Minnesota. Disa nga librat e tij janë Desiring God, Mos e ço dëm jetën, Virusi Korona dhe Krishti, Vëllezër nuk jemi profesionistë.