Siç është qiellori, ashtu do të jenë edhe qiellorët.
1 e Korintasve 15:48
Kryet dhe gjymtyrët kanë të njëjtën natyrë, pra, nuk ngjasojnë aspak me atë figurën e përbindshme që pa Nebukadnetsari në ëndrrën e tij. Koka e kësaj figure ishte prej ari të kulluar, por barku dhe kofshët prej bronzi, kërcinjtë prej hekuri, ndërsa këmbët e saj pjesërisht prej hekuri dhe pjesërisht prej argjile. Trupi mistik i Krishtit nuk është një përzierje absurde të kundërtash. Gjymtyrët e tij janë njerëz vdekatarë, ja pse edhe Jezusi vdiq në kryq; Kreu i përlëvduar është i pavdekshëm, prandaj edhe trupi është i pavdekshëm gjithashtu, siç thotë Fjala: “...sepse unë jetoj, edhe ju do të jetoni” (Gjoni 14:19).
Siç është Kreu ynë i dashur, i tillë është edhe trupi dhe çdo gjymtyrë e Tij në veçanti. Një Krye që është i zgjedhur, përkon me gjymtyrë të zgjedhura; një Krye i pëlqyer me gjymtyrë të pëlqyera; një Krye i gjallë me gjymtyrë të gjalla. Në qoftë se Kreu është prej ari të kulluar, të tilla janë edhe të gjitha pjesët e trupit. Kështu, në themel të përbashkësisë së ngushtë qëndron bashkimi i dyfishtë i natyrave.
Ndalu këtu, lexues i përkushtuar, dhe shiko nëse mund ta sodisësh, pa mbetur i mahnitur nga mrekullia vetë, përuljen e pafundme të Birit të Perëndisë që e lartoi mjerimin tënd në bashkim të bekuar me lavdinë e Tij. Je kaq i dobët dhe i varfër, saqë, tek kujton natyrën tënde vdekatare, mund t’i thuash prishjes: “Ti je im atë”, ndërsa krimbit: “Ti je im vëlla”; por megjithatë, në Krishtin je nderuar kaq shumë, saqë mund t’i thuash Shumë të Lartit: “Aba, o Atë” dhe Perëndisë të Mishëruar: “Ti je Vëllai dhe Bashkëshorti im.”
Me siguri, nëse lidhjet e gjakut me familje të fisme e të lashta i bëjnë njerëzit të lëvdohen, ne kemi arsye edhe më të forta sesa të gjithë ata që të lëvdohemi. Edhe besimtari më i vobektë e më i përbuzur e bëftë të vetin këtë privilegj; le të mos lejojë që një përtaci e pamend ta pengojë atë që të gjurmojë prejardhjen e tij, dhe le të mos përqendrohet aq shumë në gjërat e këtushme dhe të tanishme, sa të mos arrijë të meditojë me dobi për këtë nder të lavdishëm dhe qiellor të bashkimit me Krishtin!
© dritez.al 2024
