Nëntor 2022
Askush nuk është ndier i padashur, sepse iu tha që arritja e gëzimit të tij do ta bëjë dikë tjetër të lumtur. Kurrë nuk jam akuzuar për egoizëm kur e kam justifikuar një mirësi mbi faktin që ajo më jep kënaqësi. Përkundrazi, veprimet e bëra me dashuri janë të vërteta në atë masë që të mos bëhen duke u ankuar.
Dhe alternativa e mirë e bërjes së diçkaje duke u ankuar nuk është ta bësh me indiferentizëm apo se e ke për detyrë, por ta bësh me gëzim. Zemra e vërtetë e dashurisë e do mëshirën (Mikea 6:8), jo thjesht tregon mëshirë. Hedonizmi i krishterë na shtrëngon që ta marrim parasysh këtë të vërtetë.
Në këtë njohim që i duam bijtë e Perëndisë; kur duam Perëndinë dhe mbajmë urdhërimet e tij. Sepse kjo është dashuria e Perëndisë: që ne të mbajmë urdhërimet e tij; dhe urdhërimet e tij nuk janë të rënda. Sepse gjithçka që ka lindur prej Perëndisë e mund botën. (1 e Gjonit 5:2-4)
Lexoji këto fjali në rendin e kundërt dhe shiko logjikën. Së pari, të kesh lindur nga Perëndia të jep një fuqi që e mund botën. Kjo jepet si baza apo themeli (vër re fjalën “Sepse”) për deklaratën që thotë se urdhërimet e Perëndisë nuk janë të rënda.
Pra, të qenët i lindur nga Perëndia të jep një fuqi që e mposht antipatinë e botës ndaj vullnetit të Perëndisë. Tani urdhërimet e Tij nuk janë “të rënda”, por ato janë dëshira dhe kënaqësia e zemrës sonë. Kjo është dashuria e Perëndisë: jo vetëm që t’i zbatojmë urdhërimet e Tij, por edhe fakti që ato nuk janë të rënda.
Pastaj, në vargun 2, prova e vërtetësisë së dashurisë sonë për bijtë e Perëndisë thuhet se është dashuria për Perëndinë. Çfarë na mëson kjo për dashurinë tonë ndaj bijve të Perëndisë?
Përderisa dashuria për Perëndinë është që ta bëjmë me gëzim vullnetin e Tij dhe jo sikur të jetë barrë, dhe përderisa dashuria për Perëndinë është standardi i vërtetësisë së dashurisë sonë ndaj bijve të Perëndisë, atëherë edhe dashuria jonë për bijtë e Tij duhet të ushtrohet me gëzim dhe jo me ankesa.
Hedonizmi i krishterë qëndron hapur në shërbim të dashurisë, duke qenë se na nxit drejt bindjes së gëzueshme dhe jo thjesht drejt bindjes me ankesa.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022