Gusht 2022
Për të ditur se çfarë është e drejtë, Perëndia nuk konsultohet me asnjë autoritet më të lartë se vetja e Tij. Denjësia e Tij është vlera më e lartë në gjithësi. Prandaj, që Perëndia bën atë çka është e drejtë, do të thotë se Ai vepron në atë mënyrë që të përputhet me këtë vlerë përfundimtare.
Drejtësia e Perëndisë është zelli, gëzimi dhe kënaqësia e pafundme, që Ai ka në atë që është pafundësisht e vlefshme, domethënë në denjësinë dhe përsosmërinë e Tij. Perëndia do të ishte i padrejtë nëse do të vepronte ndonjëherë në kundërshtim me këtë pasion të përjetshëm për përsosmëritë e Tij–Ai do të ishte idhujtar.
Si mundet një Perëndi i tillë i drejtë ta vendosë dashurinë e Tij mbi mëkatarë si ne, që kemi përçmuar përsosmëritë e Tij? Por mrekullia e ungjillit është që në drejtësinë e Tij hyjnore gjendet gjithashtu edhe themeli i shpëtimit tonë.
Konsiderata e pafundme që Ati ka për Birin, bën të mundur që unë, një mëkatar i lig, të duhem dhe të pranohem në Birin, sepse me vdekjen e vet Biri lartësoi vlerën e lavdisë së Atit të Tij.
Për shkak të Krishtit, ne mund ta bëjmë lutjen e psalmistit me një kuptim të ri: “Për hir të emrit tënd, o ZOT, fale paudhësinë time, sepse ajo është e madhe” (Psalmi 25:11). Kuptimi i ri është që, për shkak të Krishtit, në vend që të lutemi thjesht: “Për hir të emrit tënd, fale paudhësinë time”, tani ne lutemi: “Për hir të emrit Jezus, o ZOT, fale paudhësinë time.”
Letra e parë e Gjonit 2:12 thotë: “Djema, ju shkruaj sepse mëkatet ju janë falur për shkak të emrit të tij”, duke iu referuar Jezusit. Tani Jezusi ka bërë shlyerjen për mëkatin dhe e ka lartësuar nderin e Atit, prandaj “mëkatet ju janë falur për shkak të emrit të tij”.
Perëndia është i drejtë. Ai nuk e fsheh mëkatin nën rrogoz. Nëse një mëkatar falet, dikush ka vdekur në vend të tij për të lartësuar vlerën e pafundme të lavdisë së Perëndisë, të cilën mëkatari e ka përçmuar. Pikërisht këtë bëri Krishti! Prandaj, “Për hir të emrit tënd, o ZOT” dhe “për hir të emrit të Krishtit” janë e njëjta gjë. Kjo është arsyeja pse lutemi me siguri për falje.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022