Nëntor 2022
Është krejt e mundur që ta kërkosh Perëndinë pa e përlëvduar Atë. Nëse duam që kërkimi ynë ta nderojë Perëndinë, ne duhet ta ndjekim Perëndinë për gëzimin e përbashkësisë me Të.
Mendoje shabatin si një ilustrim të kësaj. Zoti qorton popullin e tij, sepse ka kërkuar kënaqësinë e vet gjatë ditës së shenjtë të Perëndisë. “Në rast se e përmban këmbën që të mos dhunosh shabatin, në rast se nuk i kryen punët e tua gjatë ditës sime të shenjtë.” Çfarë po thotë Ai me këtë? A po thotë se nuk duhet të kërkojmë gëzimin tonë në Ditën e Zotit? Jo, sepse Ai vazhdon të thojë: “në rast se e quan shabatin kënaqësi”. Dhe në vargun 14: “Do të gjesh kënaqësinë tënde te ZOTI.” Prandaj, ajo që Zoti po kritikon, është se ata po kënaqen në punën e tyre ditën e shabatit, në vend që të kënaqen në bukurinë e Perëndisë së tyre, si dhe në prehjen dhe shenjtërinë që përfaqëson kjo ditë.
Perëndia nuk po i qorton për hedonizmin e tyre. Ai po i qorton për dobësinë e atij hedonizmi. Siç tha edhe C. S. Lewis: “Ne kënaqemi tepër kollaj.” Ata kënaqen me interesat laike dhe kështu i nderojnë ato më tepër se Zotin.
Vër re se ta quash shabatin “kënaqësi”, shkon paralel me fjalën “meriton nder” për ditën e Zotit. “Në rast se e quan shabatin kënaqësi, ditën e shenjtë të ZOTIT, që meriton nder…” Kjo do të thotë thjesht që ti e nderon atë në të cilën kënaqesh, ose e përlëvdon atë me të cilën kënaqesh.
Të kënaqurit me Perëndinë dhe përlëvdimi i Perëndisë janë e njëjta gjë. Qëllimi i Tij i përjetshëm dhe kënaqësia jonë e përjetshme bashkohen në një përjetim adhurim. Për këtë ekziston Dita e Zotit. Në të vërtetë ky është qëllimi i gjithë jetës.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022