7 prill, mbrëmje – Një zemër e thyer

Çliromë nga gjaku i derdhur, o Perëndi, Perëndi i shpëtimit tim, dhe gjuha ime do të kremtojë tërë gaz drejtësinë tënde.

Psalmi 51:14

Është gjë e dobishme ta shohësh Davidin tek e shpall haptazi mëkatin e tij në këtë rrëfim solemn. Ai nuk e quan vrasje pa dashje dhe as nuk e etiketon si një pakujdesi për shkak të së cilës një aksident fatkeq i ndodhi një njeriu të drejtë, por i vë mëkatit emrin e tij të vërtetë: “gjaku i derdhur”. Davidi nuk e vrau me duart e veta burrin e Bath-Shebës; por meqenëse në zemrën e vet kishte bërë plan që Uriahu duhej të vritej, përpara Zotit, Davidi ishte përgjegjës për vrasjen e tij. Mësohu të jesh i ndershëm me Perëndinë kur i rrëfen mëkatet e tua! Mos u vër emra të bukur mëkateve të neveritshme, sepse sido që t’i quash, ato do të kutërbojnë erë të keqe! Duhet të përpiqesh që për ty ato të jenë ashtu siç i sheh Perëndia; dhe me gjithë zemrën tënde duhet ta pranosh natyrën e tyre të vërtetë. Vër re se si Davidi ishte qartazi i rënduar nga fëlliqësia e mëkatit të tij! Fjalët përdoren lehtë, por vështirë se mund ta ndiesh me zemër domethënien e tyre. Psalmi i pesëdhjetenjëtë është tabloja e një fryme të penduar. Le të kërkojmë të shfaqim të njëjtën zemër të thyer; sepse sado të shkëlqyera që të jenë fjalët tona, në qoftë se zemra jonë nuk është e vetëdijshme që mëkati meriton të ndëshkohet në ferr, nuk mund të presim që të marrim falje!

Vargu ynë përmban një lutje me gjithë zemër, e cila i drejtohet Perëndisë së shpëtimit. Është e drejta e Tij sovrane të falë; është vetë emri dhe ofiqi i Tij që t’i shpëtojë ata që kërkojnë fytyrën e Tij. Edhe më mirë akoma, vargu e quan Atë: Perëndia i shpëtimit tim. Ne bekojmë emrin e Tij, sepse ndërsa shkojmë ende tek Ai përmes gjakut të Jezusit, mund të ngazëllehemi në Perëndinë e shpëtimit tonë.

Psalmisti e mbyll me një betim të lavdërueshëm: në qoftë se Perëndia do ta shpëtojë, ai do të këndojë—në fakt, ai do të “kremtojë tërë gaz”. Vallë, kush mund ta bëjë të heshtë lavdërimin e tyre nën dritën e një mëshire kaq të madhe sa kjo?! Mirëpo, vërejeni temën e këngës: “drejtësinë tënde”. Duhet t’i këndojmë veprës së përfunduar të Shpëtimtarit të çmuar; dhe ai që e njeh më mirë këtë dashuri falëse, do të këndojë me më shumë gaz nga të gjithë ne.