Prill 2022
Pali përmend dy mënyra specifike për ta kujtuar Jezusin: Kujtoje Atë si Ai që u ringjall prej së vdekurish dhe kujtoje Atë si pasardhësin e Davidit. Pse t’i kujtojmë këto dy gjëra për Jezusin?
Sepse, nëse Ai është ringjallur prej së vdekurish, Ai është i gjallë dhe triumfues mbi vdekjen—përfshirë këtu edhe mbi vdekjen tonë! “Por në qoftë se Fryma i atij që ringjalli Krishtin prej së vdekurish... do t’u japë jetë edhe trupave tuaj vdekatarë me anë të Frymës së tij që banon në ju” (Romakëve 8:11).
Kjo do të thotë se nuk ka rëndësi se sa serioze bëhet vuajtja, sepse pasoja më e rëndë që mund të shkaktojë këtu në tokë, është vdekja jote. Jezusi ia ka hequr gjembin vdekjes, armikut tonë. Ai është i gjallë! Edhe ti do të jesh i gjallë. “Dhe mos kini frikë nga ata që vrasin trupin, por nuk mund të vrasin shpirtin” (Mateu 10:28).
Për më tepër, ringjallja e Jezusit nuk ishte një ringjallje e rastësishme, por vetë ringjallja e birit të Davidit. “Kujto Jezu Krishtin, prej farës së Davidit, të ringjallur prej së vdekurish.” Pse e thotë Pali këtë?
Sepse çdo jude, e dinte çfarë do të thoshte kjo. Kjo do të thoshte se Jezusi është Mesia (Gjoni 7:42). Gjithashtu do të thoshte se kjo ringjallje, ishte ringjallja e një Mbreti të përjetshëm. Dëgjo fjalët që engjëlli i tha Marisë, nënës së Jezusit:
“Dhe ja, ti do të mbetesh shtatzënë dhe do të lindësh një djalë dhe do t’ia vësh emrin Jezus. Ai do të jetë i madh dhe do të quhet Biri i Më të Lartit; dhe Zoti Perëndi do t’i japë fronin e Davidit, atit të tij; dhe do të mbretërojë mbi shtëpinë e Jakobit përjetë dhe mbretëria e tij nuk do të ketë kurrë të sosur.” (Luka 1:31-33).
Prandaj, kujto Jezusin, Atë të cilit i shërben dhe Atë për të cilin vuan. Ai jo vetëm që është i gjallë prej së vdekurish, por Ai është i gjallë si një Mbret që do të mbretërojë përjetë—mbretëria e Tij nuk do të ketë të sosur. Pavarësisht se çfarë të bëjnë njerëzit, mos ki frikë. Ti do të jetosh sërish dhe do të mbretërosh bashkë me Të.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022