26 qershor, mbrëmje – Çfarë të kënaq

…pasi u arratisët nga prishja që është në botë për shkak të epshit.

2 e Pjetrit 1:4

Largoje nga mendja përgjithmonë çdo mendim për ta kënaqur mishin nëse do të jetosh në fuqinë e Zotit tënd të ringjallur. Është e papajtueshme që një njeri, i cili është i gjallë në Krishtin, të jetojë në prishjen e mëkatit. “Ç’e kërkoni të gjallin midis të vdekurve?”, u tha engjëlli grave. Si mund të jetojnë vallë të gjallët në varre? Si mund ta murosim vallë jetën hyjnore brenda katakombës së epshit mishëror? Si mund të pimë nga kupa e Zotit e pastaj të shkojmë e të shijojmë nga kupa e djallit? Me siguri, o besimtar, je çliruar nga epshet dhe mëkatet flagrante, por a ke shpëtuar nga ato që janë më të fshehta dhe më mashtruese? A i ke shpëtuar epshit të krenarisë? Po përtacisë? A ke hequr dorë nga besimi në gjërat tokësore? A po mundohesh ditë për ditë të jetosh mbi botëdashurinë, krenarinë e jetës dhe kontrollit kurthues të lakmisë?

Sill ndër mend që pikërisht për këtë qëllim, që të mund të njohësh fitoren, je pasuruar me thesaret e Perëndisë. Nëse je me të vërtetë i zgjedhuri i Perëndisë dhe i dashuri i Tij, mos lejo që i gjithë ky thesar bujar i hirit të harxhohet mbi ty! Ndiqe pas shenjtërinë; ajo është kurora dhe lavdia e të krishterit. Një kishë e pashenjtë është e padobishme për botën dhe pa dinjitet mes njerëzve. Është diçka e neveritshme, tallja e ferrit dhe krupa e parajsës. Të këqijat më të mëdha që e kanë zënë këtë botë, kanë ardhur prej një kishe të pashenjtë. O i krishterë, betimet e Perëndisë janë mbi ty.

Ti je shërbëtori i Perëndisë: sillu, pra, si i tillë! Ti je mbreti i Perëndisë: mbretëro, pra, mbi epshet e tua! Ti je i zgjedhuri i Perëndisë: mos u shoqëro me Satanin! Qielli është pjesa jote: jeto si një shpirt qiellor, sepse kështu do të provosh që ke besim të vërtetë në Jezusin, pasi nuk mund të kesh besim në zemër nëse nuk jeton një jetë vërtet të shenjtë.

Zot, dëshiroj të jetoj si dikush
Që mban një emër blerë me gjak,
Si dikush që druhet vetëm se Ty mos të trishton,
Dhe tjetër turp nuk njeh.