Shkurt 2022
Kudo që predikonte Pali disa besonin dhe disa nuk besonin. Si ta kuptojmë arsyen pse disa nga ata që ishin të vdekur në shkelje dhe mëkate (Efesianëve 2:1, 5) besuan dhe disa të tjerë jo?
Arsyeja pse disa nuk besuan është që ata “e hodhën poshtë” fjalën e Perëndisë (Veprat 13:46), sepse mesazhi i ungjillit ishte “marrëzi për [ta], dhe nuk mund” ta njihnin (1 e Korintasve 2:14). Mendja e mishit “është armiqësi ndaj Perëndisë, sepse nuk i nënshtrohet ligjit të Perëndisë dhe as nuk mundet” (Romakëve 8:7).
Kushdo që e dëgjon dhe e refuzon ungjillin “e urren dritën dhe nuk vjen te drita, që të mos zbulohen veprat e tij” (Gjoni 3:20). Ata qëndrojnë të “errësuar në mendje...për shkak të padijes që është në ta dhe të ngurtësimit të zemrës së tyre” (Efesianëve 4:18). Kjo është një padije fajtore. E vërteta është e arritshme. Sidoqoftë, ata e “mbysin të vërtetën në padrejtësi” (Romakëve 1:18).
Gjithsesi, pse disa besojnë, përderisa të gjithë janë në këtë gjendje ngurtësimi rebel të zemrës dhe të vdekur në shkelje dhe mëkate? Libri i Veprave na e jep përgjigjen të paktën në tri mënyra të ndryshme. Një është që ata janë caktuar për të besuar. Kur Pali predikoi në Antioki të Pisidisë, johebrenjtë u gëzuan dhe “të gjithë sa ishin të caktuar për jetën e përjetshme, besuan” (Veprat 13:48).
Një mënyrë tjetër për t’iu përgjigjur pse disa besuan është që Perëndia u dha pendimin. Kur shenjtorët në Jerusalem dëgjuan se johebrenjtë, dhe jo vetëm judenjtë, po reagonin ndaj ungjillit, ata thanë: “Perëndia, pra, edhe kombeve u dha pendesën për t’u dhënë jetën” (Veprat 11:18).
Gjithsesi, përgjigjja më e qartë te Veprat për pyetjen pse një person e beson ungjillin është se Perëndia është Ai që e hap zemrën. Lidia është shembulli më i mirë. Pse besoi ajo? Veprat 16:14 thotë: “Dhe Zoti ia hapi zemrën për të dëgjuar ato që thoshte Pali.”
Nëse ti je besimtar në Jezusin, të gjitha këto të ndodhën edhe ty: Ti ishe caktuar për të besuar; t’u dha pendimi; dhe Zoti të hapi zemrën. Pjesën tjetër të jetës tënde duhet të gufosh me falënderim për mrekullinë që je një besimtar.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022