Qershor 2022
Sigurimi i përditshëm i hirit të ardhshëm nga Perëndia e aftëson Palin të nginjet ose të ketë uri, të jetojë në bollëk ose të jetë i përulur, të ketë me tepri ose të jetë në ngushticë.
“Unë mund të bëj gjithçka”, do të thotë me të vërtetë “gjithçka”, jo vetëm gjërat e lehta. “Gjithçka” do të thotë: “Përmes Krishtit mund të kem uri, të vuaj dhe të jem në nevojë.” Kjo e vendos premtimin marramendës të Filipianëve 4:19 në dritën e duhur: “Dhe Perëndia im do të plotësojë të gjitha nevojat tuaja sipas pasurisë së tij në lavdi, në Kristin Jezus.”
Çfarë kuptimi ka fraza “të gjitha nevojat tuaja” nën dritën e Filipianëve 4:11-12? Do të thotë “gjithçka që ke nevojë për kënaqësinë që përlëvdon Perëndinë.” Kjo mund të përfshijë edhe kohë urie dhe nevoje. Dashuria e Palit për filipianët buronte nga kënaqësia e tij në Perëndinë dhe kënaqësia e tij buronte nga besimi i tij në hirin e ardhshëm të furnizimit të sigurt të Perëndisë për të qenë gjithë sa ai kishte nevojë në kohët e bollëkut dhe të ngushticës.
Prandaj është e qartë se lakmia është krejt e kundërta e besimit. Është humbja e kënaqësisë në Krishtin që na bën të fillojmë të lakmojmë gjëra të tjera për t’i përmbushur dëshirat e zemrave tona të cilat mund t’i kënaqë vetëm prania e vetë Perëndisë. Nuk ka pikë dyshimi që beteja kundër lakmisë është një betejë kundër mosbesimit në premtimin e Perëndisë për të qenë gjithë sa kemi nevojë në çdo rrethanë.
Kjo është shumë e qartë te Hebrenjve 13:5. Shiko se si autori e argumenton lirinë tonë nga dashuria për paranë—lirinë nga lakmia—lirinë e kënaqësisë në Perëndinë: “Sjellja juaj të jetë pa lakmi paraje dhe kënaquni me atë që keni, sepse vetë Perëndia ka thënë: ‘Nuk do të të lë, as nuk do të të braktis.’” Besimi në këtë premtim—“Nuk do të të lë kurrë”—e thyen fyqinë e të gjitha dëshirave që e çnderojnë Perëndinë—e thyen fuqinë e çdo lakmie.
Kurdoherë që ndiejmë edhe prirjen më të vogël të lakmisë në zemrat tona, duhet të merremi me të dhe ta luftojmë me gjithë fuqinë tonë duke përdorur armët e këtij besimi.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022