Prill 2022
Nëse kjo ishte e vërtetë për të mërguarit e Perëndisë në Babiloni, duket se është edhe më e vërtetë për të mërguarit e krishterë në këtë botë shumë “babilonase”. Atëherë, çfarë të bëjmë?
Ne duhet të bëjmë gjërat e zakonshme që duhen bërë: të ndërtojmë shtëpi dhe të jetojmë në to, të mbjellim kopshte. Nuk të ndot kjo, nëse e bën të gjithën për Mbretin e vërtetë, dhe jo thjesht për sytë e njerëzve, si ata që duan t’u pëlqejnë njerëzve.
Kërko mirëqenien e vendit ku Perëndia të ka dërguar. Mendo se je dërguar atje nga Perëndia për lavdinë e Tij, sepse kështu është vërtet.
Lutju Zotit për llogari të qytetit tënd. Kërko që gjëra të mëdha dhe të mira të ndodhin për qytetin. Kërko që të ndodhin përmes fuqisë së Perëndisë dhe për lavdinë e Tij. Kurrë mos lejo që të të shpëtojë e mira përfundimtare për të cilën qyteti ka nevojë më tepër sesa për begatinë materiale. Të krishterët shqetësohen për çdo lloj vuajtjeje, por veçanërisht për vuajtjen e përjetshme. Ky është rreziku më i madh me të cilin përballet çdo qytet.
Është e qartë që as Perëndia dhe as banorët e Tij nuk janë indiferentë ndaj shëndetit, sigurisë, begatisë dhe lirisë së qytetit tënd. Ne të gjithë i duam këto gjëra dhe Jezusi thotë: “Duaje të afërmin tënd porsi vetveten” (Mateu 22:39). Në fakt, Zoti i thotë Jeremias që dashuria për qytetin është një mënyrë për ta dashur veten: “Sepse mirëqenia juaj varet nga mirëqenia e tij.”
Kjo nuk do të thotë që të heqim dorë nga orientimi ynë prej mërgimtari. Pjetri thotë që të krishterët janë “të huaj dhe shtegtarë” (1 e Pjetrit 2:11) dhe Pali thotë se “qytetaria jonë është në qiej” (Filipianëve 3:20). Në fakt, ne do të bëjmë më të mirën për këtë botë duke mbajtur një liri të qëndrueshme nga joshjet e saj mashtruese. Ne do t’i shërbejmë më mirë qytetit tonë duke i marrë vlerat nga “qyteti që do të vijë” (Hebrenjve 13:14). Ne do t’i bëjmë më shumë të mira qytetit tonë, duke thirrur sa më shumë që të mundemi nga qytetarët e Tij që të bëhen qytetarë të “Jerusalemit lart” (Galatasve 4:26).
Prandaj, le të jetojmë—le të bëjmë sa më shumë të mira (1 e Pjetrit 2:12)—që vendasit të kenë dëshirë të takojnë Mbretin tonë.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022