Dhjetor 2022
Sipas Hebrenjve 8:6, Krishti është Ndërmjetësi i besëlidhjes së re. Çfarë do të thotë kjo? Do të thotë se gjaku i Tij–gjaku i besëlidhjes (Luka 22:20; Hebrenjve 13:20)–bleu dhe siguroi përfundimisht dhe me siguri të plotë plotësimin e premtimeve të Perëndisë për ne.
Kjo do të thotë se Perëndia, sipas premtimeve të besëlidhjes së re, sjell transformimin tonë të brendshëm përmes Frymës së Krishtit.
Kjo do të thotë gjithashtu se Perëndia e arrin këtë transformim në ne përmes besimit–besim në atë që Perëndia është për ne në Krishtin.
Besëlidhja e re është blerë me gjakun e Krishtit, bëhet e efektshme përmes Frymës së Krishtit dhe përvetësohet me anë të besimit në Krishtin.
Vendi më i mirë për ta parë Krishtin të punojë si ndërmjetësi i besëlidhjes së re është Hebrenjve 13:20-21:
Dhe Perëndia i paqes, që e nxori lart prej së vdekurish, me anë të gjakut të besëlidhjes së përjetshme, Bariun e madh të dhenve, Zotin tonë Jezu Krisht, ju bëftë të përsosur për çdo vepër të mirë, që të kryeni vullnetin e tij, duke punuar në ju atë që është e pëlqyer përpara tij, përmes Jezu Krishtit, të cilit i qoftë lavdia në jetë të jetëve. Amen.
Fjalët “duke punuar në ju atë që është e pëlqyer përpara tij” përshkruajnë çfarë ndodh kur Perëndia e shkruan ligjin në zemrat tona në përputhje me besëlidhjen e re. Dhe fjalët “përmes Jezu Krishtit”, përshkruajnë Jezusin si ndërmjetësin e kësaj vepre të lavdishme të hirit të Tij sovran.
Prandaj, kuptimi i Krishtlindjes nuk është vetëm që Perëndia i zëvendëson hijet me realitetin, por gjithashtu që e sjell në jetë realitetin për popullin e Tij. Ai e shkruan në zemrat tona. Perëndia nuk e vendos dhuratën e Krishtlindjes, shpëtimin dhe transformimin poshtë një peme, nëse mund ta themi kështu, që ta marrësh me fuqitë e tua. Ai e merr dhe e vendos në zemrën dhe mendjen tënde, dhe të jep vulën e sigurisë që je një fëmijë i Perëndisë.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022