5 dhjetor – Pse ndodhi Krishtlindja?

Dy herë te 1 e Gjonit 3:1-10 na tregohet pse ndodhi Krishtlindja—domethënë pse Biri hyjnor, i përjetshëm, i Perëndisë erdhi në botë si njeri.

Në vargun 5, Gjoni thotë: “Dhe ju e dini se ai u shfaq për të hequr mëkatet tona; dhe në të nuk ka mëkat.” Kështu afirmohet pamëkatshmëria e Krishtit—“në Të nuk ka mëkat.”  Arsyeja për ardhjen e Tij, afirmohet gjithashtu në: “Ai u shfaq për të hequr mëkatet tona.”

Pastaj, në pjesën e dytë të vargut 8, Gjoni thotë: “Për këtë është shfaqur Biri i Perëndisë: për të shkatërruar veprat e djallit.” Fokusi i veçantë që ka në mendje Gjoni, kur thotë “veprat e djallit”, është mëkati, që nxitet nga djalli. Këtë gjë e shohim në pjesën e parë të vargut 8: “Kush kryen mëkat është nga djalli, sepse djalli mëkaton nga fillimi.” Prandaj veprat e djallit, të cilat Jezusi erdhi t’i shkatërrojë, janë veprat e mëkatit.

Gjoni na thotë dy herë se Krishtlindja—Biri i Perëndisë u bë njeri—ndodhi për të hequr mëkatin, ose për të shkatërruar veprat e djallit, domethënë mëkatin. Jezusi lindi prej një virgjëreshe, përmes Frymës së Shenjtë (Mateu 1:18-20). Ai “rritej në urtësi, dhe në shtat dhe në hir përpara Perëndisë dhe njerëzve” (Luka 2:52) dhe ishte përsosmërisht i bindur dhe i pamëkat në gjithë jetën dhe shërbesën e Tij, deri në vdekje, madje deri në vdekje të kryqit (Filipianëve 2:5-8; Hebrenjve 4:15)—në mënyrë që të shkatërronte veprat e djallit—të largonte mëkatin.

Mëkatin tonë; Bëje tënden këtë të vërtetë dhe duaje Jezusin për këtë arsye; Merr vetë fjalët e Palit dhe bëji të tuat; “... Por ajo që tani jetoj në mish, e jetoj në besimin e Birit të Perëndisë, që më deshi dhe dha veten për mua” (Galatasve 2:20). Kështu i shkatërron Jezusi veprat e djallit dhe na çliron prej mëkatit tonë. Mos lejo që Krishtlindja të jetë abstrakte për ty. Mëkati yt. Konflikti yt me djallin. Fitorja jote. Këto janë arsyet, përse erdhi Jezusi.