Tetor 2022
Arsyeja pse ka kaq shumë mjerim në martesë, nuk është fakti që burrat dhe gratë kërkojnë kënaqësinë e tyre, por fakti që nuk e kërkojnë atë në kënaqësinë e partnerit të tyre. Mandati biblik për burrat dhe gratë është të kërkosh gëzimin tënd në gëzimin e partnerit tënd.
Zor se ka ndonjë pasazh më tepër hedonist në Bibël sesa ai që flet për martesën tek Efesianëve 5:25-30. Burrat duhet t’i duan gratë e tyre, ashtu si Krishti e deshi kishën.
Si e deshi Krishti kishën? Vargu 25 thotë se Ai e “dha veten e tij për të”. Pse? Vargu 26 thotë: “që ta shenjtërojë” dhe ta pastrojë atë. Përse donte ta bënte ai këtë? Vargu 27 përgjigjet: “që ta paraqesë atë përpara vetes së tij si një kishë të lavdishme.”
Ah! Ja ku është! “Për gëzimin që ishte përpara tij, duroi kryqin” (Hebrenjve 12:2). Cilin gëzim? Gëzimin e martesës me nusen e Tij, kishën. Gëzimin e paraqitjes së kishës para vetes së Tij, veshur me një lavdi të blerë me gjak.
Jezusi nuk synon të ketë një grua të pisët dhe jo të shenjtë. Prandaj Ai ishte i gatshëm që të vdiste për ta shenjtëruar dhe për ta pastruar të fejuarën e Tij, që të kishte mundësi ta paraqiste atë para vetes si një bashkëshorte “të lavdishme”. Ai e përmbushi dëshirën e zemrës së Tij duke e dhënë veten e Tij të vuajë për të mirën e nuses së Tij.
Pastaj Pali e zbaton këtë gjë te burrat në vargjet 28-30: “Kështu burrat duhet t’i duan gratë e tyre si trupat e tyre. Kush do gruan e vet, do vetveten. Sepse askush nuk e urreu kurrë mishin e vet, por e ushqen dhe kujdeset me ngrohtësi për të, sikurse Zoti bën me kishën, sepse ne jemi gjymtyrë të trupit të tij, prej mishit të tij dhe prej kockave të tij.”
Jezusi u kishte thënë burrave dhe grave–dhe gjithë të tjerëve–“Duaje të afërmin tënd porsi vetveten” (Mateu 22:39). Martesa është një vend i jashtëzakonshëm për ta zbatuar këtë urdhërim. Nuk është thjesht “siç” e do veten. Por ti realisht po tregon dashuri për veten. Kur e do personin me të cilin Perëndia të ka bërë një mish, ti je duke e dashur veten. Kjo do të thotë se gëzimi yt më i madh gjendet në kërkimin e gëzimit më të madh të bashkëshortes tënde.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022