6 maj – Njohuria më e qartë sjell gëzim më të madh

I vetmi gëzim që reflekton vlerën e Perëndisë dhe i cili shprehet bujarisht në dashuri që përlëvdon Perëndinë është gëzimi i rrënjosur në njohurinë e Perëndisë. Nëse njohuria jonë është e vogël apo e mangët, gëzimi ynë do të jetë një jehonë e dobët e përsosmërisë së vërtetë të Perëndisë.

Përjetimi i Izraelit te Nehemia 8:12 është një model se si ndodh në zemër gëzimi që e lavdëron Perëndinë. Ezdra u kishte lexuar fjalën e Perëndisë dhe levitët e kishin shpjeguar atë. Pastaj njerëzit u larguan “të kremtojnë me hare të madhe”.
Ky kremtim me hare të madhe ishte sepse ata i kishin kuptuar fjalët—fjalët e vërteta të Perëndisë.

Shumica prej nesh e kemi shijuar këtë përjetim në zemrën që na digjej nga gëzimi kur na u shpjegua fjala e Perëndisë (Luka 24:32). Jezusi tha dy herë se i mësoi dishepujt për hir të gëzimit të tyre.

▪Gjoni 15:11: “Këto gjëra jua kam thënë që gëzimi im të qëndrojë në ju dhe gëzimi juaj të jetë i plotë.”

▪Gjoni 17:13: “I flas këto gjëra në botë, që të kenë gëzimin tim plotësisht në veten e tyre.”

Gjëja kryesore që shohim është vetë Zoti—vetë Perëndia —i cili e ofron veten e Tij që ta njohim dhe ta shijojmë. “Në Shiloh Zoti i shfaqej Samuelit me anë të fjalës së Zotit” (1 e Samuelit 3:21).

Ideja është që nëse gëzimi ynë do të reflektojë lavdinë e Perëndisë, atëherë ai duhet të rrjedhë nga njohuria e vërtetë se si Perëndia është i lavdishëm. Nëse duam që të kënaqemi ashtu si duhet me Perëndinë, duhet ta njohim me të vërtetë Atë.