Mars 2022
Perëndia zhvesh çdo dhimbje nga fuqia e saj shkatërruese. Këtë duhet ta besosh, ose ndryshe nuk do të lulëzosh dhe ndoshta as do të mbijetosh si i krishterë në mes të trysnive dhe tundimeve të jetës moderne.
Ka kaq shumë dhimbje, kaq shumë pengesa dhe dekurajime, kaq shumë polemika dhe presione. Nuk e di ku do të shkoja, nëse nuk do të besoja se Perëndia i plotfuqishëm po merr çdo pengesë, çdo dekurajim, çdo polemikë, çdo presion dhe çdo dhimbje, dhe po i zhvesh ato nga fuqia e tyre shkatërruese dhe në të njëjtën kohë, po i bën të bashkëveprojnë për zmadhimin e gëzimit tim në Perëndinë.
Dëgjo fjalët e mahnitshme të Palit te 1 e Korintasve 3:21-23: “Të gjitha janë tuajat; qoftë Pali, qoftë Apoli, qoftë Kefa, qoftë bota, qoftë jeta, qoftë vdekja, qoftë gjërat e tanishme, qoftë gjërat e ardhshme, të gjitha janë tuajat. Dhe ju jeni të Krishtit dhe Krishti është i Perëndisë.” Bota është e jona, jeta është e jona, vdekja është e jona dhe këtë unë e marr me kuptimin: Perëndia mbretëron në mënyrë aq supreme për të mirën e të zgjedhurve të Tij, saqë gjithçka me të cilën përballemi gjatë një jete bindjeje dhe shërbimi, do të nënshtrohet nga dora e pushtetshme e Perëndisë dhe do t'i shërbejë shenjtërisë sonë dhe gëzimit tonë të përjetshëm në Perëndinë.
Nëse Perëndia është për ne, dhe nëse Perëndia është Perëndi, atëherë është e vërtetë se asgjë s’mund të ketë sukses kundër nesh. Ai që nuk e kurseu Birin e Tij, por e dha për ne të gjithë, bashkë me Të do të na i japë të gjitha gjërat, lirshëm dhe pa kthim—të gjitha gjërat—botën, jetën, vdekjen dhe vetë Perëndinë.
Vargu i Romakëve 8:32 është për ne si një mik i çmuar. Premtimi i hirit të ardhshëm të Perëndisë të rrëmben zemrën. Ama jashtëzakonisht i rëndësishëm është themeli i këtij premtimi, të cilin e kam quajtur logjika e qiellit. Ky është një vend ku mund të qëndrosh kundër çdo pengese. Perëndia nuk e kurseu Birin e Tij! Prandaj! Prandaj! Logjika e qiellit! Prandaj, aq më tepër Ai nuk do të kursejë përpjekjet për të na dhënë gjithçka, për të cilën Krishti vdiq që ta blejë—të gjitha gjërat, të gjitha të mirat dhe të gjitha të këqijat, që bashkëveprojnë për të mirën tonë!
Kjo është po aq e sigurt, sa edhe fakti që Ai e deshi Birin e Tij!
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022