Maj 2022
Jezusi nuk ka frikë dhe turp të na thotë që në fillim “më të keqen”—çmimi me dhimbje i të qenët i krishterë është: të urresh familjen (vargu 26), të mbash kryqin (vargu 27), të heqësh dorë nga zotërimet (vargu 33). Në besëlidhjen e hirit nuk ka asgjë të fshehur. Gjithçka është shkruar me shkronja të mëdha dhe të trasha. Nuk ka hir që nuk koston! Hiri është shumë i kushtueshëm! Eja dhe bëhu dishepulli im!
Kurse satani e fsheh më të keqen dhe na tregon vetëm më të mirën. Gjithçka që ka rëndësi në marrëveshjen me satanin është shkrimi me shkronja të vogla në faqen e pasme.
Në faqen e parë të marrëveshjes së tij është shkruar me shkronja të mëdha dhe të trasha: “Ju s’keni për të vdekur aspak” (Zanafilla 3:4) dhe “Të gjitha këto do të t’i jap nëse ti bie përmbys dhe më adhuron” (Mateu 4:9). Por në faqen e pasme, e shkruar me shkronja të vogla—të cilat janë aq të vogla saqë mund t’i lexosh vetëm me lupën e Biblës—thuhet: “Dhe pas kënaqësive kalimtare do të vuash bashkë me mua në ferr.”
Pse Jezusi është i gatshëm të na tregojë si “më të keqen” e Tij ashtu edhe më të mirën, kurse satani do të na tregojë vetëm më të mirën? Matthew Henry na e jep përgjigjen kështu: “Satani tregon më të mirën, por fsheh më të keqen, sepse më e mira e tij nuk do të [kompensojë] më të keqen e tij; por më e mira e Krishtit do të na kompensojë bollshëm.”
Thirrja e Jezusit nuk është vetëm një thirrje për vuajtje dhe vetmohim; së pari, ajo është një thirrje për një banket. Ky është thelbi i shëmbëlltyrës te Luka 14:16-24. Jezusi gjithashtu na premton një ringjallje të lavdishme ku do të shpërblehen të gjitha humbjet e kësaj jete (Luka 14:14). Ai gjithashtu na thotë se do të na ndihmojë t’i durojmë vështirësitë (Luka 22:32) dhe se Ati ynë do të na japë Frymën e Shenjtë (Luka 11:13). Jezusi na premton që edhe nëse na vrasin për mbretërinë, “as edhe një fije floku e kokës suaj nuk do të humbasë” (Luka 21:18).
Kjo do të thotë se kur ulemi dhe e llogarisim çmimin e ndjekjes së Jezusit—kur llogarisim “më të keqen” dhe “më të mirën”—del se Ai ia vlen. Ia vlen tej mase (Romakëve 8:18; 2 e Korintasve 4:17)!
Nuk është kështu me satanin. “Buka e nxjerrë me hile është e ëmbël për njeriun, por pastaj goja e tij do të mbushet me zaje” (Fjalët e Urta 20:17).
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022