16 mars – Jezusi do ta përfundojë misionin

Nuk di të ketë ndonjë premtim tjetër misionar më frymëzues sesa kjo fjalë nga Jezusi.

Jo: Ky ungjill duhet të predikohet.
Jo: Ky ungjill mund të predikohet.
Por: Ky ungjill do të predikohet.

Kjo nuk është një porosi e madhe, as urdhërim i madh. Kjo është një siguri dhe garanci e madhe.

Kush guxon të flasë kështu? Nga e di Jezusi që do të ndodhë? Çfarë sigurie ka Ai që kisha nuk do të dështojë në detyrën e saj misionare?

Përgjigjja: Hiri i shërbimit misionar është aq i parezistueshëm sa edhe hiri i rilindjes. Krishti mund të premtojë shpalljen universale, sepse Ai është sovran. Ai e di suksesin e ardhshëm të misioneve, sepse Ai e bën të ardhmen. Të gjitha kombet do të dëgjojnë!

Një “komb” nuk është një “vend” modern. Kur Dhiata e Vjetër fliste për kombet, u referohej grupeve si jebusejtë, perezejë, hivejtë, amorejtë, moabitët, kananejtë dhe filistejtë. “Kombet” janë grupe etnike me gjuhën dhe kulturën e tyre të veçantë. Psalmi 117:1 thotë: “Lëvdoni Zotin, ju gjithë kombet! Kremtojeni, ju gjithë popujt!” Kombet janë popuj, të cilët i quajmë grupe njerëzish.

Si Biri sovran i Perëndisë dhe Zoti i kishës, Jezusi e mori këtë qëllim hyjnor dhe e deklaroi atë si një siguri absolute: “Ky ungjill i mbretërisë do të predikohet në gjithë botën si një dëshmi për gjithë kombet” (Mateu 24:14).

Është absolutisht e sigurt që kauza e misionit botëror do të ketë sukses. Nuk mund të dështojë. Prandaj, a nuk është e arsyeshme, që të lutemi me besim të madh, që të investojmë me siguri të madhe dhe që të shkojmë me ndjesinë që triumfi është i sigurt?