11 nëntor – Ne jemi shtëpia e Tij

Njerëzit që mburren dhe shpresojnë në Jezu Krishtin, janë shtëpia e Perëndisë. Kjo do të thotë se Jezusi është Krijuesi ynë, Zotëruesi, Sunduesi dhe Siguruesi ynë pikërisht sot, jo vetëm në kohën e Moisiut ose në kohën e Tij mbi tokë.

Jezusi quhet “ndërtuesi” i kësaj shtëpie. Moisiu nuk ishte ndërtuesi. Ai ishte pjesë e shtëpisë. Prandaj thuhet: “Sepse Jezusi është i denjë për më shumë lavdi se Moisiu, meqenëse ai që ndërton shtëpinë ka më shumë nder se shtëpia.” Prandaj, Moisiu, pavarësisht se ishte i madh në udhëheqjen e shtëpisë dhe për faktin se i dha shtëpisë fjalën e Perëndisë, ai ende ishte thjesht një pjesë e shtëpisë, të cilën Jezusi e ndërtoi.

Prandaj, nëse mburremi në Jezusin dhe shpresojmë në Të, ne jemi shtëpia e Tij, dhe Jezusi është Ndërtuesi ynë, Zotëruesi, Sunduesi dhe Siguruesi ynë. Ai nuk lejon që shtëpia e Tij të shkatërrohet ose të rrënohet.

Më pas shkrimtari e ndryshon imazhin–nga ndërtuesi dhe shtëpia, në bir dhe shërbëtor. “Dhe Moisiu vërtet qe besnik në gjithë shtëpinë e tij si shërbëtor... por Krishti si bir, mbi shtëpinë e tij.” Pra, Krishti u bë pjesë e shtëpisë–pjesë e familjes–që Ai ndërtoi. Por edhe kështu, nderi i Tij është shumë më i lartë se ai i Moisiut. Moisiu ishte një shërbëtor. Krishti është Biri. Ai është trashëgimtari.

Dhe ne jemi pjesë e kësaj shtëpie. Hebrenjve 3:6 thotë: “Shtëpia e të cilit jemi ne, në mbajtshim fort, deri në fund, guximin dhe mburrjen e shpresës.” Sigurisht, le ta respektojmë Moisiun dhe t’i japim atë që i takon, por ideja kryesore e librit të Hebrenjve është kjo: Krishti është më i madh. Ai është më i madh në çdo aspekt. Ai është ndërtuesi i shtëpisë së popullit të Perëndisë. Krishti është Biri në shtëpinë e popullit të Perëndisë. Le ta respektojmë Moisiun, por të adhurojmë Jezusin–Krijuesin dhe vëllain tonë.