nentor 25

Nëntor 2022


Mirënjohja ndaj Perëndisë është një emocion i gëzueshëm. Ne kemi një ndjesi borxhi të gëzueshëm për hirin e tij. Prandaj, në njëfarë kuptimi, në vetë emocionin e mirënjohjes, ne jemi ende përfitues. Por në vetë natyrën e saj, mirënjohja përlëvdon dhënësin. Kur ndihemi mirënjohës, ne e pranojmë nevojën tonë dhe bamirësinë e Perëndisë, plotësinë e Tij dhe pasuritë e lavdisë së Tij.

Ashtu sikurse e përul veten time dhe lartësoj kamerierin e restorantit kur i them: “Faleminderit”, po kështu e përul veten time dhe e lartësoj Perëndinë kur ndiej mirënjohje ndaj Tij. Sigurisht që ndryshimi është se unë jam me të vërtetë pafundësisht borxhli ndaj Perëndisë për hirin e Tij, dhe gjithçka që Ai bën për mua është falas dhe e pamerituar.

Ideja është që mirënjohja përlëvdon dhënësin. Ajo përlëvdon Perëndinë. Ky është synimi final i Palit në të gjitha mundimet e tij. Po, mundimet e tij janë për hir të kishës–për të mirën e kishës. Por kisha nuk është synimi i tij më i lartë. Dëgjoje sërish: “Sepse çdo gjë ndodh për shkakun tuaj që hiri duke u shtuar nëpërmjet shumë vetave të bëjë që falënderimi të teprojë për lavdi të Perëndisë.” Çdo gjë ndodh për shkakun tuaj–për lavdinë e Perëndisë!

Gjëja e mrekullueshme e ungjillit është se reagimi që ai kërkon nga ne për lavdinë e Perëndisë, është gjithashtu reagimi më i natyrshëm dhe më i gëzueshëm; domethënë, të jesh mirënjohës për hirin. Lavdia e Perëndisë që siguron gjithçka kur jep dhe ngazëllimi ynë i përulur kur pranojmë, nuk janë në konkurrencë. Falënderimi i gëzueshëm e përlëvdon Perëndinë.

Një jetë që i jep lavdi Perëndisë për hirin e Tij dhe një jetë që mbart mirënjohjen më të thellë, janë e njëjta gjë. Ajo që i bën të jenë e njëjta gjë, është falënderimi.


John Piper është themeluesi dhe mësuesi i desiringGod.org si dhe president i Kolegjit dhe Seminarit Betlehem. Ai ka shërbyer për 33 vjet si pastor i Kishës Baptiste Betlehem, në Miniapolis, Minesota. Ai është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Katër prej librave të John Piper janë botuar edhe në gjuhën shqip, Mos e Shko Dëm Jetën, Pes Pika – Drejt një përjetimi më të thellë të hirit të Perëndisë, Virusi Korona dhe Krishti dhe Lajm i Mirë, Gëzim i Madh.

Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.

©️ dritez.al 2022


EtiketaSolid Joys

Postime të ngjashme

29 Dhjetor – Një fat i tmerrshëm
>