Janar 2023

“Përlëvdova një të zgjedhur nga populli.”

Psalmi 89:19

Përse u zgjodh Krishti nga gjiri i popullit? Fol, zemra ime, sepse mendimet e tua janë më të mirat. Vallë, a nuk ndodhi kjo sepse Ai duhet të bëhej vëllai ynë me anë të një lidhjeje farefisnore të shenjtë? Oh, ç’marrëdhënie e bekuar që e lidh Krishtin me besimtarin! Besimtari mund të thotë: “Kam një Vëlla në qiell. Mund të jem i varfër, por kam një Vëlla që është i pasur dhe që është Mbret. A do të më lërë Ai të vuaj nga skamja ndërkohë që Ai është i ulur mbi fronin e Tij? Oh, jo! Ai më do; Ai është Vëllai im!”. 

Besimtar, vare këtë mendim të bekuar përreth qafës së kujtesës sate porsi një gjerdan diamantesh! Vendose atë si një unazë prej ari në gishtin e kujtesës dhe përdore si vulën e Mbretit, për t’i vulosur përgjërimet e besimit tënd me sigurinë e përmbushjes. Ai është një vëlla i lindur për ditë të vështira, prandaj konsideroje Atë si të tillë. 

Krishti u zgjodh nga gjiri i popullit edhe për një arsye tjetër, që të mund t’i njihte nevojat tona dhe të identifikohej me ne. “[Ai] u tundua në të gjitha njësoj si ne, por pa mëkat.” (Hebrenjve 4:15) Në të gjitha pikëllimet tona përjetojmë dhembshurinë e Tij. Në ka tundim, dhimbje, zhgënjim, dobësi, lodhje a skamje, Ai i njeh që të gjitha, sepse i ka provuar të gjitha në kurriz të Vet. 

I krishterë, kujtoja vetes këtë dhe lëre të të ngushëllojë! Sado e vështirë dhe e dhimbshme qoftë rruga jote, ajo është shënjuar nga gjurmët e Shpëtimtarit tënd; madje edhe sikur të ecësh në luginën e errët të hijes së vdekjes dhe sikur të çash përmes ujërave të thella të Jordanit shkumëzues, edhe aty ti do t’i gjesh gjurmët e Shpëtimtarit tënd. Kudo që të shkojmë, në çfarëdo vendi, Ai ka kaluar andej përpara nesh, dhe çdo barrë që na duhet ta mbartim, Emanueli ynë e ka mbajtur dikur mbi supet e Tij.

Rruga e Tij ishte më e thepisur dhe më e errët se imja;

Kur Krishti, Zoti im, vuajti për vete, si mund të qahem unë?

Merr zemër! Këmbët mbretërore kanë lënë një vijë të kuqe gjaku mbi udhë dhe e kanë shenjtëruar një herë e përgjithmonë shtegun e mbuluar me gjemba.


Devocione “Mëngjes dhe mbrëmje” nga C. H. Spurgeon, rishikuar dhe përditësuar nga Alistair Begg.

Përktheu: Elton Tahirllari | Redaktoi: Rudina Boçe

Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.

© dritez.al 2023

EtiketaSpurgeon

Autor 

Redaktori

Postime të ngjashme

5 shkurt, mëngjes – Roli i Atit
>