“…Me të vërtetë, me të vërtetë po të them: po të mos lindet dikush prej uji dhe Fryme, nuk mund të hyjë në Mbretërinë e Perëndisë.” GJONI 3:5
Kur lexojmë Ungjijtë, zbulojmë se një pjesë e madhe e shërbesës së Jezusit përfshinte predikimin e lajmit të mirë të mbretërisë së Perëndisë. Ai udhëtoi nëpër qytete dhe fshatra duke u thënë njerëzve me pak fjalë: Ka një mbretëri dhe unë jam Mbreti i saj. Ju nuk jeni ende në mbretëri — por nëse do të më ndiqni Mua, do të jeni nënshtetas i Mbretit dhe një qytetar i mbretërisë.
Prandaj, kur lutemi “Ardhtë mbretëria jote” (Luka 11:2), dëshira jonë duhet të jetë që burrat dhe gratë të sillen në mbretërinë e Krishtit përmes lindjes së re — që ata të bëhen ndjekës të përkushtuar të Jezusit. Ne lutemi që ata që jetojnë në rebelim kundër Perëndisë, të çlirohen “prej pushtetit të errësirës dhe [të zhvendosen] në mbretërinë e Birit të dashurisë së tij” (Kolosianëve 1:13). Jezusi e bëri përsosurisht të qartë se kjo lindje e re është e vetmja mënyrë për të hyrë në mbretërinë e Tij.
Takimi i Jezusit me Nikodemin te Gjoni 3 thekson këtë të vërtetë. Nikodemi ishte një njeri fetar, një njeri me autoritet dhe ndikim — e megjithatë, ai ishte ende i shqetësuar, ende në kërkim. Ndërsa ai u përfshi në bisedë, Jezusi i vuri në dukje parakushtin e nevojshëm si për të parë, ashtu edhe për të hyrë në mbretërinë e Tij: se duhej të lindte përsëri nga Fryma. Ai i tha se kjo lindje e re nuk ndodh nga natyra, por është rezultat i Frymës së Perëndisë që bën një mrekulli në zemrën e njeriut. Askush nuk mund të hyjë në mbretëri nëse Fryma nuk punon në të; askush nuk është tepër larg nga mbretëria, saqë Ai të mos punojë dot në të.
Kur lutemi për ardhjen e mbretërisë së Perëndisë, ne kërkojmë që të hapen sytë dhe veshët, që burrat dhe gratë të mund të lindin përsëri. Mbreti po vjen për të sjellë mbretërinë e Tij të përjetshme, dhe Mbreti është duke punuar sot me anë të Frymës së Tij, për t’i sjellë burrat dhe gratë në atë mbretëri. Deri në ditën e kthimit të Mbretit tonë, vetëdija juaj për mënyrën se si hyjnë njerëzit në mbretërinë e Krishtit prodhoftë një mahnitje gjithnjë e më të madhe për kthimin tuaj në besim, si dhe një pasion të zjarrtë për t’u lutur që Fryma të bëjë në zemrat e të humburve atë që vetëm Ai mundet ta bëjë.
