Korrik 2022
Sipas Dhiatës së Re, “shërbesa” është ajo që e bëjnë të gjithë të krishterët. Sipas Efesianëve 4:11-12, pastorët kanë punën e pajisjes së shenjtorëve për veprën e shërbesës, por të krishterët e zakonshëm janë ata që e bëjnë shërbesën.
Mënyrat se si duket shërbesa, janë po aq të larmishme sa dhe vetë të krishterët. Ajo nuk është ofiq si ai i plakut apo dhjakut; shërbesa është një stil jete i përkushtuar ndaj lartësimit të Krishtit dhe plotësimit të nevojave të të tjerëve.
Kjo do të thotë se ne u “bëjmë të mirën të gjithëve, por më shumë atyre që janë pjesëtarë të shtëpisë së besimit” (Galatasve 6:10). Qofshim bankierë apo muratorë, kjo do të thotë se synimi ynë është ta nxitim besimin dhe shenjtërinë e njerëzve të tjerë për lavdinë e Perëndisë.
Plotësimi i shërbesës tënde është më i rëndësishëm sesa të qëndruarit gjallë. Kjo bindje është ajo çfarë e bën aq frymëzuese soditjen e jetëve të njerëzve radikalisht të përkushtuar. Shumica prej tyre flasin ashtu si foli Pali për shërbesën e tij këtu te Veprat 20:24: “Por unë nuk dua t’ia di fare, dhe as jetën time nuk e çmoj aq, sa të kryej me gëzim vrapimin tim dhe shërbesën, që mora nga Zoti Jezus.” Përmbushja e shërbesës që Perëndia na jep të bëjmë, është më e rëndësishme se jeta.
Ti mund të mendosh se ke nevojë ta shpëtosh jetën tënde, në mënyrë që ta përmbushësh shërbesën tënde. Përkundrazi, mënyra se si e humbet jetën, mund të jetë mënyra se si e përmbush shërbesën. Sigurisht që kështu ishte për Jezusin–vetëm se Atij i ndodhi në të tridhjetat.
Nuk ka pse të shqetësohemi për ta mbajtur veten gjallë që të përmbushim shërbesën tonë. Vetëm Perëndia e di kohën e caktuar për shërbimin tonë. Ai do të vendosë se kur vdekja jonë nuk është ndërprerje e shërbesës që bëjmë, por akti i fundit i shërbesës tonë.
Henry Martyn kishte të drejtë kur tha: “Nëse [Perëndia] ka punë që unë duhet të bëj, atëherë nuk mund të vdes.” Me fjalë të tjera, unë jam i pavdekshëm derisa puna ime të jetë përmbushur. Prandaj shërbesa është më e rëndësishme se jeta.
John Piper është themeluesi dhe mësuesi i desiringGod.org si dhe president i kolegjit dhe seminarit Bethlehem. Ai ka shërbyer për 33 vjet si pastor i kishës baptiste Bethlehem, në Miniapolis, Minesota. Piper-i është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Pesë prej librave të John Piper-it janë botuar edhe në gjuhën shqip, Mos e shko dëm jetën; Pesë pika – Drejt një përjetimi më të thellë të hirit të Perëndisë; Virusi Korona dhe Krishti; Lajm i mirë, gëzim i madh dhe Soditja dhe shijimi i Jezu Krishtit.
Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.
©️ dritez.al 2022