dhjetor 27

Dhjetor 2022


Çfarë i thua vetes tënde kur zgjohesh në mëngjes në lidhje me shpresën që ke për atë ditë? Kur e konsideron ditën nga fillimi në fund, çfarë dëshiron të ndodhë për shkak se e jetove atë ditë?

Nëse thua: “Unë nuk mendoj fare kështu. Thjesht zgjohem dhe bëj atë që duhet të bëj,” atëherë po e shkëput veten nga një mjet bazë i hirit dhe nga një burim udhëzimi, force, frytshmërie dhe gëzimi. Në Bibël bëhet jashtëzakonisht e qartë, përfshirë edhe këto tekste, që Perëndia ka si qëllim që ne me vetëdije të synojmë diçka domethënëse në ditët tona.

Vullneti i zbuluar i Perëndisë për ty është që kur të zgjohesh në mëngjes, të mos e shtysh ditën pa një qëllim duke lejuar që rrethanat të vendosin atë që bën, por që të synosh diçka–të fokusohesh në një qëllim të caktuar. Këtu po flas për fëmijët, për adoleshentët dhe për të rriturit–për beqarët, për të martuarit, për vejanët dhe vejushat, për nënat, si dhe për çdo zanat apo profesion tjetër.

Mungesa e synimit është e ngjashme me mungesën e jetës. Gjethet e thara në oborr mund të lëvizin më shumë se çdo gjë tjetër–madje më shumë se qeni dhe fëmijët. Era fryn këndej dhe ato shkojnë këndej. Era fryn andej dhe ato shkojnë andej. Ato rrokullisen, kërcejnë, hidhen, ngjiten pas gardhit, por nuk kanë kurrfarë synimi. Ato janë plot lëvizje, por pa jetë.

Perëndia nuk i krijoi qeniet njerëzore në shëmbëllimin e Tij që të mos kishin një synim, si puna e gjetheve pa jetë, që i merr era në kopshtin e jetës. Ai na krijoi që të kishim qëllim–të kishim një përqendrim dhe një synim për të gjitha ditët tona. Cili është synimi yt sot? Cili është synimi yt për vitin e ri? Një vend i mirë ku mund të fillosh, është 1 e Korintasve 10:31: “Pra, nëse hani, nëse pini, nëse bëni ndonjë gjë tjetër, të gjitha t’i bëni për lavdinë e Perëndisë.”


John Piper është themeluesi dhe mësuesi i desiringGod.org si dhe president i Kolegjit dhe Seminarit Betlehem. Ai ka shërbyer për 33 vjet si pastor i Kishës Baptiste Betlehem, në Miniapolis, Minesota. Ai është autor i më shumë se 50 librave ku përfshihen Desiring God: Meditations of a Christian Hedonist dhe libri i tij më i ri Providence. Katër prej librave të John Piper janë botuar edhe në gjuhën shqip, Mos e Shko Dëm Jetën, Pes Pika – Drejt një përjetimi më të thellë të hirit të Perëndisë, Virusi Korona dhe Krishti dhe Lajm i Mirë, Gëzim i Madh.

Shënim: Ju mund ta shpërndani këtë material, pa ndryshuar aspak përmbajtjen. Sigurohuni të citoni “botuar me leje nga dritez.al” dhe vendosni hallkën (linkun) e këtij artikulli nga faqja jonë në internet.

©️ dritez.al 2022


EtiketaSolid Joys

Postime të ngjashme

29 Dhjetor – Një fat i tmerrshëm
>