24 maj – Shkëmbi i sigurisë tënde

Bibla flet për zgjedhjen tonë—që Perëndia na zgjodhi—në Krishtin para themelimit të botës (Efesianëve 1:4), para se ne të kishim bërë ndonjë të mirë apo të ligë (Romakëve 9:11). Prandaj, zgjedhja jonë është e pakushtëzuar në kuptimin më të prerë. As besimi ynë dhe as bindja jonë nuk është baza e saj. Zgjedhja jonë është e lirë dhe krejtësisht e pamerituar.

Nga ana tjetër, ka dhjetëra pasazhe në Bibël të cilat flasin për shpëtimin tonë përfundimtar (përkundrejt zgjedhjes tonë në përjetësinë e shkuar) si të kushtëzuar nga një zemër dhe një jetë e ndryshuar. Prandaj pyetja që shtrohet është: Si mund ta kem sigurinë që do të këmbëngul në besimin dhe shenjtërinë e nevojshme për të trashëguar jetën e përjetshme?

Përgjigjja është se siguria është e rrënjosur në zgjedhjen tonë. Letra e dytë e Pjetrit 1:10 thotë: “Jini të zellshëm aq më shumë ta përforconi thirrjen dhe zgjedhjen tuaj, sepse, duke bërë këto gjëra, nuk do të pengoheni kurrë.” Zgjedhja hyjnore është themeli i përkushtimit të Perëndisë për të më shpëtuar, dhe për pasojë Ai do të marrë përsipër që të punojë në mua përmes hirit shenjtërues atë që u fillua nga hiri i Tij i zgjedhjes.

Ky është kuptimi i besëlidhjes së re. Kushdo që beson në Jezusin është përfitues i sigurt i besëlidhjes së re, sepse Jezusi tha te Luka 22:20: “Kjo kupë është besëlidhja e re në gjakun tim.” Ai po thotë se me gjakun tim po e siguroj besëlidhjen e re për të gjithë ata që janë të mitë.

Në besëlidhjen e re, Perëndia nuk është thjesht duke urdhëruar bindjen; Ai e jep bindjen. “Zoti, Perëndia yt, do ta rrethpresë zemrën tënde dhe zemrën e pasardhjes sate, që ti ta duash Zotin, Perëndinë tënd, me gjithë zemër e me gjithë shpirt, dhe kështu ti të jetosh” (Ligji i Përtërirë 30:6). “Do të vë brenda jush Frymën tim dhe do të bëj që ju të ecni sipas statuteve të mia” (Ezekieli 36:27; krahaso me 11:20). Këto janë premtime të besëlidhjes së re.

Zgjedhja është përkushtimi i përjetshëm i Perëndisë për ta bërë këtë gjë për popullin e Tij. Prandaj, zgjedhja është garancia se ata që Perëndia i drejtëson me anë të besimit, Ai do t’i përlëvdojë me siguri të plotë (Romakëve 8:30). Kjo do të thotë se Ai do të punojë për t’i plotësuar pa dështuar në ne të gjitha kushtet që janë caktuar për përlëvdimin tonë.

Zgjedhja është themeli final i sigurisë për shkak se, meqë përkushtimi i Perëndisë është që të shpëtojë, po kështu është edhe përkushtimi i Tij, që të mundësojë gjithçka që është e nevojshme për shpëtim.